Ferrol 22 de febreiro de 2021. Iván Rivas, portavoz municipal do BNG en Ferrol, presentou, esta mañá, unha iniciativa, que o pleno municipal debatirá o vindeiro xoves, co obxecto de que o concello de Ferrol presente unha denuncia diante da Unión Europea por infracción do dereito comunitario produto da sentenza do Tribunal Supremo que exime a Navantia do pago do IBI ás arcas municipais.

Iván Rivas sinalou que a situación que vive o concello de Ferrol con respecto á falla de ingresos xa non é soportábel durante moito máis tempo e considera que vai sendo hora que empecemos a tomar este tema en serio.

Iván Rivas, afirmou que considera que esta vía é a que debemos adoptar fronte a sentenza do Tribunal Supremo que se salta por riba unha cuestión prexudicial solicitada por parte do xulgado de Ferrol que no seu momento demandaba a Navantia o pago do IBI e a na que se indicaba que os terreos do estaleiro público da nosa cidade estaban suxeitos ao pago do IBI e que a intención de Navantia de non pagar este tributo municipal era contrario ás normas de europeas. Cabe destacar que estas cuestións prexudiciais son de obrigado cumprimento para os tribunais de xustiza dos estados membros da UE.

A Lei Orgánica do Poder Xudicial obriga a ter que aplicar o dereito da UE conforme ao dereito da xurispridencia do Tribunal de Xustiza da Unión Europea e as cuestións prexudiciais, a estas alturas, todas temos claro que forman parte e son pezas chave do sistema xurídico da Unión Europea.

Para Iván Rivas é significativo que por parte do goberno local se teña tanta presa en recoñecer a suposta exención do IBI á empresa Navantia en base a unha sentenza que é moi cuestionábel. É totalmente incomprensíbel que o goberno municipal teña tanta presa en anular as liquidacións que neste procedemento xudicial se están a recoller. Estamos a falar de 4,39 millóns de euros aos que o goberno local de Ferrol renuncia sen cuestionar estes aspectos que desde o BNG nos parecen tan obvios e tan evidentes que non ten ningunha lóxica a actuación que está a manter este goberno local.

O BNG explica que o proceso de interposición dunha cuestión prexudicial é sinxelo, o xuíz do estado membro identifica cal é a dubida de aplicación do dereito europeo e con esa dúbida lla transmite ao Tribunal de Xustiza da UE para obter unha resolución e un posicionamento específico. O Tribunal da Unión Europea resolve a dubida e a xustiza do Estado membro ten que aplicar a sentenza en función da resolución que fai o TXUE. Así foi como fixo o xulgado do contencioso administrativo de Ferrol, así o ratificou o TSXG e sorprendentemente o Tribunal Supremos se saltou este dictame e polo tanto infrinxe o dereito recollido por ese tribunal.

O BNG destaca que as cuestións prexudiciais non son interpretativas nin son opcionais, son de obrigada aplicación en función dos criterios que alí se estabelecen e lembra, ademais, que o TXUE é un órgao xerarquicamente superior ao TS e cuxa posición non pode saltarse nin condicionar a aplicación desta sentenza en función dos criterios que alí se estabelecen.

Iván Rivas, insistiu en que nesta cidade temos un problema de ingresos. Ferrol é un caso único en todo o estado pola ocupación que o Ministerio de Defensa ten de máis do 20% do solo urbano da cidade. Os terreos que ocupa a empresa Navantia son unha parte deste problema de Ferrol. O BNG cre que é preciso insistir e afondar na necesidade de modificar a Lei que lle permite ao Ministerio de Defensa manter as bonificacións sobre os tributos locais e é preciso acadar unha compensación económica, nos orzamentos do estado, que sexa capaz de paliar esta perda de ingresos. Para o BNG hai que enfrontar este problema con contundencia, abandonando a demagoxia e enfrontándonos a decisións, como estas, que son absolutamente contraditorias e que van en contra do estabelecido en ámbitos dos que supostamente o estado forma parte e cando menos deberia asumir e acatar.

No pleno municipal do xoves o BNG demandará ao goberno local que no prazo de 10 días interpoña esta denuncia, é un trámite sen custo económico, que polo tanto é incomprensíbel que non se adopte en base aos criterios mencionados e diante da evidencia de que a sentenza do Tribunal Supremo se está a saltar os ditámenes do dereito comunitario.