Ferrol 13 de outubro de 2021. Iván Rivas, portavoz municipal do BNG no concello de Ferrol considera que os orzamentos xerais do estado para 2022 certifican a burla do que o presidente da Xunta de Galiza deu en chamar “Pacto de Estado por Ferrol” e que contou co aval do PSOE co alcalde da cidade à fronte. Para o portavoz nacionalista esta especie de bipartidismo harmónico no que se teñen instalado tanto o PP como o PSOE esta a levar á cidade a unha situación límite.

Así mentres o PP desde a Xunta de Galiza precariza a sanidade, o ensino e o transporte co peche de consultorios como o de Ferrol Vello, un transporte por estrada deficitario e suprime o ensino nocturno para adultos, o PSOE e Podemos desde a administración Estatal e a través destes orzamentos para o próximo 2022 manteñen as gradas dos estaleiros baleiras, o illamento ferroviario da cidade e continúan sen poñer un euro para compensar a perda de ingresos que ten a cidade produto da ocupación de terreos polo ministerio de Defensa.

Estes orzamentos para o ano 2022 esquecen a situación actual dos estaleiros da ría e remítennos un ano máis ao inicio das fragatas F110 polas que levamos agardando preto de 10 anos mentres se reduce o plantel da empresa Navantia e continuamos coas gradas baleiras ao tempo que se anuncia un BAM para os estaleiros de Cádiz.

A parte substancial dos importes consignados nestes orzamentos para 2022 limítanse a proxectos xa comprometidos en anualidades anteriores e teñen que ver con investimentos a desenvolver pola Autoridade Portuaria, fundamentalmente derivados do acceso ferroviario ao Peirao exterior e coa execución do taller de subbloques en terreos do Mº de Defensa por parte da SEPI.

Respecto das infraestruturas ferroviarias e a conexión coa cidade de A Coruña a ninguén se lle escapa que os 128.100 euros consignados para este ano 2022 están moi lonxe dos importes necesarios para acometer esta obra, e moito máis aínda dos supostos proxectos presentados polo Alcalde da cidade que superan os centos de millóns de euros, e que hoxe quedan en nada.

En relación coa ría e as demandas das confrarías nada hai previsto para desenvolver un plan de rexeneración da ría que permita recuperar a súa produtividade. Como tampouco existe ningún importe destinado á recuperación do castelo de San Felipe ou a acometer a rexeneración urbana e patrimonial da cidade.

Por estes motivos, Iván Rivas, portavoz nacionalista, demandou do Alcalde da cidade que abandone a política de panos quentes co goberno do Estado, que deixe de lado as directrices partidaria do PSOE e que pase a defender dunha vez os intereses da cidade, tanto para acometer a rexeneración da ría, renovar as infraestruturas ferroviarias como dotar de carga de traballo inmediata aos estaleiros.