Ferrol 4 de febreiro de 2022.Iván Rivas, portavoz municipal do BNG en Ferrol, presentou esta mañá a campaña que o BNG vai desenvolver ao longo das vindeiras semanas na nosa cidade en relación coa situación na que se atopan os servizos ferroviarios en Ferrol e a necesidade da súa modernización e impulso, que se desenvolverá baixo o lema de “Ferrol quere tren”.

Iván Rivas, portavoz nacionalista, indicou que a mellora dos servizos ferroviarios é un dos principais retos que ten a cidade, ademais de que é un servizo fundamental para vertebrar o territorio de Ferrol coa comarca e co país e para o desenvolvemento económico dunha cidade que tantas necesidades ten e para iso contar cunhas infraestruturas de transporte ferroviarias que o faciliten é básico ademais de ser básico para a cohesión social.

Iván Rivas salientou que da actual situación só sairemos se somos capaces de criar unha demanda social suficiente que faga reaxir aos responsábeis políticos desta situación, o goberno do Estado e a Xunta de Galiza.

A situación de abandono na que nós atopamos contou de xeito permanente coa complicidade da Xunta de Galiza tanto cando no goberno do Estado tomaba as decisións o PP como cando o fai o PSOE. Lembrou que hai escasos dia visitaba a cidade a Ministra de Transporte sen aportar ningunha solución igual que é inaceptábel o comportamento do presidente da Xunta ao respecto e que nin unha nin o outro teñan unha contestacións contundente por parte do alcalde da cidade. Un alcalde que mantén un silencio cómplice dun alcalde diante desta situación.

O BNG levará a súa campaña aos diferentes barrios da cidade ao mesmo xeito que desenvolve iniciativas políticas para dar a coñecer as súas propostas para a recuperación e mellora dos servizos ferroviarios na cidade entre as que cómpre sinalar: a construción dun By-pass en Betanzos para acurtar os tempos de viaxe entre Ferrol e A Coruña por debaixo dunha hora; O aumento do número de Servizos á Coruña posibilitando conexións con destino ao resto do país e a dotación de material rodante igual que o do resto do Eixo Atlántico; Acometer a modernización do trazado ferroviario entre Ferrol e A Coruña, contemplando a electrificación e dupla vía; ou a creación dunha compañía pública ferroviaria galega que mellore a prestación deste servizo e permita desenvolver os servizos de transporte ferroviario na Galiza contribuíndo a vertebración económica, social e territorial do país.