Ferrol 15 de xuño de 2022. O Bloque Nacionalista Galego de Ferrol ven de presentar un un recurso extraordinario de reposición contra os acordos plenarios que aprobaron o pago de facturas a Acuaes pola xestión dos interceptores xerais da marxe dereita da ría de Ferrol e contra o compromiso do gasto correspondente a este mesmo concepto para os exercicios económicos de 2019, 2020 e os dous primeiros trimestres de 2021 .

O BNG basea esta decisión na sentenza 00037/ 2022 do xulgado contencioso administrativo de Ferrol do 21 de marzo de 2022 que desestimou o recurso contencioso administrativo interposto por ACUAES contra a resolución do concello de Ferrol de data 16/04/2020 no que se acordara proceder á devolución de todas as facturas emitidas por ACUAES ao concello de Ferrol desde o mes de maio de 2019 até o mes de febreiro de 2020.

Iván Rivas, Portavoz municipal do BNG en Ferrol, lamenta que o goberno municipal de Ferrol se preocupe máis por salvagardar os intereses das empresas que prestan os servizos de depuración que por defender os intereses dos veciños e veciñas de Ferrol. Así mesmo, lembra que xa nas sesións plenarias que motivan este recurso, por parte do BNG, xa advertiramos que estaban a saltarse todos os procedementos de control para a xestión do diñeiro público ao querer aboar unhas facturas remitidas ao concello pola empresa pública ACUAES que ningún órgano municipal aprobou.

Hai que lembrar que a empresa ACUAES entregou unhas obras declaradas de interese xeral dous anos despois da data prevista para a súa finalización e que pretende imputarnos os sobre custos derivados destes atrasos as veciñas e veciños de Ferrol que pasarán de pagar o 10% ao 25%, dunhas obras que debera asumir o estado, de formalizarse esta demanda. Ademais ACUAES decidiu privatizar a xestión dos interceptores para entregarllos a Viaqua sen que o concello de Ferrol tivese tomado nin teña tomado ningún acordo a ese respecto.

Iván Rivas, considera grave que a única preocupación do Alcalde desta cidade, estes anos, fora pagarlle ao Estado estas facturas sen esixir a máis mínima responsabilidade polos atrasos na execución destas obras e na súa xestión, sen que exista como mínimo un acordo plenario que o avale e sobre todo salvagardando, unha vez máis, os intereses do Estado e de empresas xestoras implicadas na desastrosa xestión do sistema de depuración desta cidade a costa dos recursos e intereses económicos da veciñanza de Ferrol.

O BNG presenta este recurso contra os acordos plenarios do 29 de outubro de 2020 que aprobou o recoñecemento extraxudicial de créditos, relativo a facturas de ACUAES polos interceptores xerais da marxe dereita da ría por un importe de 161.590.92 e contra o acordo do 24 de febreiro de 2022 que aprobou o compromiso de gasto correspondente ao 57,52% do total do custo do servizo prestado dos exercicios económicos de 2019, 2020 e os dous primeiros trimestres de 2021 por un importe de 1.116.928,68 €.